Geurige pampoen en chakalaka gebak

Dit is 'n geurige pampoengereg en 'n lekker afwisseling van soetpampoen. Jy kan enige pampoensoort gebruik, ek verkies botterskorsies.

Vir 'n bykos vir ses mense het jy nodig:

3 koppies gaar pampoen,

1 gekapte groot ui,

1 gekapte knoffelhuisie,

1 gekapte soetrissie (groen),

1 teelepel fyn kardamomsaad,

'n knippie fyn naeltjies,

1 teelepel matige kerrie,

1 blikkie matige chakalaka of 300 ml tuisgemaakte chakalaka,

1 k gerasperde kaas.

Stel jou oond op 180 C om solank warm te word.

Braai die ui, knoffel en soetrissie in olyfolie tot sag. Voeg die kardamomsaad, naeltjies, kerrie by die uiemengsel en roerbraai alles deurmekaar vir 'n minuut of wat.

Meng nou die pampoen by hierdie mengsel sodat jy lekker gegeurde pampoen het.

Skep die pampoen in 'n plat groentebak en smeer die chakalaka eweredig bo-op. Besprinkel met die gerasperde kaas.

Bak nou in die oond vir 'n halfuur tot die kaas verbruin en alles lekker warm is.

#pumpkin #chakalaka