DUITSE FRIKADELLE

Mev. Grünewald van Walvisbaai in Namibië se frikkadelle kry ’n heerlike Duitse geurtjie met dié dat sy soetrissie, agurkies en mosterd bymeng. Dit gaan vir seker ’n groot staatmaker in menige kombuis word.

Genoeg vir 4-6 mense

Bereiding: 15-20 minute

Gaarmaaktyd: 20-25 minute

FRIKKADELLE

800 g maalvleis

1 groot ui, gerasper

60 ml (¼ k) pietersielie, fyn

gekap

10 ml (2 t) mosterdpoeier

3 ekstra groot eiers

250 ml (1 k) vars broodkrummels

½ geel soetrissie, fyn gekap

½ groen soetrissie, fyn gekap

4 groot agurkies, fyn gekap

sout en vars gemaalde swartpeper

olyfolie

botter

SOUS

olyfolie

2 uie, in ringe gesny

1 knoffelhuisie, fyn gekap

10 ml (2 t) mosterdpoeier

250 ml (1 k) hoenderaftreksel

sout en peper

FRIKKADELLE

Meng die maalvleis, ui, pietersielie, mosterdpoeier, eiers, broodkrummels, soetrissies en agurkies en geur met sout en vars gemaalde swartpeper. Laat rus die mengsel ’n paar minute en vorm die mengsel dan in groot frikkadelle, sowat 100 g elk. Verhit van die olyfolie en die botter en braai oor matige hitte tot gaar.

SOUS

Verhit olie in ’n pan en braai die uie en knoffel ’n paar minute. Roer die mosterd en aftreksel by, laat prut sowat 5 minute. Geur na smaak en plaas die frikkadelle in die sous. Laat prut nog ’n paar minute en sit voor saam met fyn aartappels.

#duits