Cassata

deur Barbara Joubert

Dis ’n tipies Italiaanse koek van verskillende lae roomys, elk ’n ander geur. Gewoonlik bevat dit gemengde droëvrugte. Ek maak my weergawe met 3 van my gunsteling-bestanddele.

Genoeg vir 10 – 12

• 100 g pistasieneute

• 100 g 70%-donkersjokolade

• 80 g amaretti-koekies, fyngekap (sien bl. 52)

• fyngerasperde skil van 1 lemoen

• 2 liter vanieljeroomys

1. Kap neute, sjokolade en koekies afsonderlik fyn. Meng sjokolade en lemoenskil.

2. Voer ’n broodpan met ’n volume van 1½ liter uit met kleefplastiek. Haal roomys uit vrieskas. Laat staan ’n paar minute. Verdeel roomys in 4 gelyke dele. Gebruik 3 dele en sit laaste deel terug in vrieskas om later te eet. Meng sjokolade-lemoenskil- mengsel deur een deel van roomys. Die roomys moenie gesmelt wees nie, maar wel roerbaar. Skep sjokoladelaag onderin uitgevoerde broodpan.

3. Meng pistasieneute met nog ’n deel van die roomys en skep bo-op sjokoladelaag.

4. Meng die koekies met die derde deel en skep bo-op neutelaag. Maak broodpan toe met kleefplastiek en plaas in vrieskas. Laat oornag vries tot hard. Keer uit en verwyder kleef.

#italy