Italiaanse frikkadelle

Jan Lombard het die resep by 'n vlieënier van Europa gekry toe hy in Afghanistan gewerk het. Dit maak vier tot vyf porsies. “Ons het dit baie kere gemaak en jy kan nie juis 'n fout maak nie - en dis baie lekker. Boonop is dit baie goedkoop om te maak,” sê Lombard.

Bestanddele

500 g maalvleis

2 snye brood (wit of bruin) klam gemaak met water

1 eier

2 uie

2 tamaties

Klein blikkie tamatiepuree

2 tot 3 teelepels droë origanum of Italiaanse speserye

Fyn naeltjies

Spaghetti of noedels

Koekmeel

Kookolie

Wit en swart peper

Sout

Maak so

Meng die maalvleis, brood (wat verkrummel is), eier, knypie naeltjies, een gerasperde ui, witpeper en sout. Jy kan nou so eetlepel maalvleis in die mikrogolf gaarmaak om te proe of die smaak reg is.

Maak bolletjies - bietjie groter as gholfballe - en pak in oondpan wat met olie gesmeer is. Sit dit solank in die yskas (opsioneel).

Sny uie en tamaties op. Kry 'n sif en die koekmeel gereed en ook al die ander bestanddele. Soteer ui in 'n braaipan en voeg tamaties, eetlepel tamatie puree, origanum, sout en swartpeper by. Voeg 1 tot 2 koppies water by om sous te kook. As jy verkies kan jy brandrissies, knoffel of enigiets anders nou byvoeg.

Laat kook tot tamaties sag is en meng goed. Proe vir smaak. Terwyl jy roer, sif so een eetlepel meel stadig in tot sous verdik en 'n romerige tekstuur kry. Gooi sous oor frikkadelle en bedek met foelie. Bak in oond teen 180 grade vir 40 minute. Terwyl dit bak, kook die pasta. Bedien met sous en frikkadelle oor 'n bord pasta.

#italy