Franse Hoenderkasserol deur Anton Boshoff

Bestandele

1 hoender of 12 vlerkies opgesny in klein porsies (behou van die vel ook - vir geur) en geur liggies met hoender speserye, maar nie sout nie.

2 medium uie – dun in ringe gesny

3-4 geelwortels – in growwe stukke gesny

3 murgpampoentjies en/of groenboontjies en/of seldery gekap)

4-5 medium aartappels opgesny in kwarte of agstes

1 klein tot medium tamatie opgekap

125g klein sampioene - gahalveer

8-12 klein piekel uie – geskil maar heel

1 pakkie hoenderroom soppoeier

125ml suurroom

1 opgehoopte teelepel knoffel (crushed garlic)

Swartpeper (±1½ teelepel)

Franse tarragon kruie ±1½ teelepel

1½ teelepel droë tiemie

Sout na smaak (versigtig met die sout, die soppoeier is alreeds souterig).

Margerine of botter vir roerbraai

± 700 - 800 ml kookwater.

Metode

Smelt die margerine of botter in groot pot. Braai die hoender in die pot tot die vel lekker bruin is (ruik of jy dit sommer nou wil eet). Verwyder die hoender uit die pot en braai die uie tot ligbruin. Voeg die knoffel by en braai nog 1 minuut (as jy die knoffel te lank braai word dit bitter). Voeg die hoender weer by en roerbraai saam vir nog 2-3 minute.

Voeg die tamatie, wortels, (seldery – indien jy dit gebruik), aartappels, murgpampoentjies, piekeluitjies en kookwater by. Daar moet genoeg water wees om die meeste van die inhoud in die pot te bedek. Sprinkel mildelik met swartpeper en voeg die tarragon en tiemie by. Roer deur en hou op die stoof tot dit begin kook.

Plaas deksel op, plaas in die oond teen 180° C en bak vir 45 minute.

Na 45 minute word die sampioene en die soppoeier bygevoeg (meng eers vooraf die sopppoeier met bietjie koue water en roer die klonte uit). Vul die kookwater aan indien nodig. (Die dis moet redelik baie sous hê sodat jy dit met ‘n soplepel kan opskep.)

Bak sonder die deksel vir nog 15 minute teen 180° C. Maak seker die hoender en groente is sag.

Verwyder die pot uit die oond en roer die suurroom in, meng deeglik. Moenie weer kook nie anders sal die suurroom skif. Proe en voeg nog sout by indien benodig.

Bedien op rys en skep die sous mildelik saam met die kos. (As die kos swem in die sous is dit dalk bietjie te veel sous in die bord.) Skep met ‘n soplepel.

Van pure lekkerte mop ons die laaste sous in die bord met ‘n dik sny tuisgebakte brood, jy kan net nie stop voor dit op is nie!

#france #pluimvee #bredie