Franse Slaai

RESEP PETER VAN NOORD FOTO’S MIKE ROSE

Vir 4 mense

Dié Franse slaai het ek een slag in Parys geëet: Dis nie jou gewone vaal blaarkonkoksie nie – met die tuna, eier, kaas, boontjies en neute kan dit maklik op ’n Saterdagmiddag ’n maaltyd wees. Veral as die Groot Eet vanaand wag…

Jy benodig

• ’n pak gemengde slaaiblare

• ’n hand vol roketblare

• 1 klein rooi- of witui, middeldeur en in dun skyfies gesny

• 1 blik (170 g) tuna, gedreineer en in stukkies gebreek

• 1 blik (410 g) gesnyde groenboontjies (of vars gestoomde boontjies of groenaspersies)

• Avokados! Sny hulle in dun skyfies en bedrup met suurlemoensap

• ’n hand vol groenolywe

• 4 hardgekookte eiers, in die lengte in kwarte gesny

• 1 pakkie (100 g) pekanneute, liggies gerooster

• 4 snye dag oue witbrood, korsies afgesny en gerooster

• 1 rolletjie romerige bokmelkkaas, in skyfies gesny

• heuning om oor te drup

VIR DIE SOUS

• ½ koppie olyfolie

• 2 eetlepels witasyn

• ’n mespuntjie droë mosterd

• sout en varsgemaalde swartpeper

Só maak jy

• Die fondament. Rangskik die blare in ’n groot slaaibak of vier borde. Moenie skrik as dit karig lyk nie – daar’s nog baie wat kom.

• Deur die blare. Pak nou die res van die bestanddele – uie-ringe, tunastukke, boontjies, avokadoskyfies, olywe, eierkwarte en pekanneute – tussenin.

• ’n Skeut sous. Klits die be-standdele vir die slaaisous goed saam en drup ’n bietjie oor elke bord slaai. Nie te kwistig nie.

• En die kersie op die koek… Pak die brood op ’n oondpan en sit ’n kaasskyfie op elkeen. Druk dit vir twee minute onder die oond se roosterelement sodat die kaas lekker sag word en die brood verder rooster. Rond elke slaaibord af met ’n brood-en-kaastorinkie en drup ’n bietjie heuning oor elkeen.

#france