ST GEORGE-HOENDER MET PANCETTA & KAPPERTJIESADE

Sjef, kosskrywer, skrywer van vyf boeke, en lief vir Frankryk – dis Marlene van der Westhuizen. Sy spandeer so drie maande per jaar in Charroux, Auvergne, by hulle kothuis en nooi vier groepe gaste per jaar om saam met haar op dié Middeleeuse dorpie te woon, kos op markte te koop en dan voor te berei.

Vir haar is Sondae kuier-dae, en hoender is altyd ’n wenner. Dié resep kom uit haar nuwe boek Oorvloed (Human & Rousseau/Bookstorm), wat in September gepubliseer word.

ST GEORGE-HOENDER MET PANCETTA & KAPPERTJIESADE

6 elk hoenderdye en -boudjies

3 e goeie olyfolie

1 e botter

150 g pancetta (of gewone spek), in blokkies gesny

75 g klein kappertjiesade

4 knoffelhuisies, gekap

bouquet garni (roosmaryn, pietersielie, 2 lourierblare en tiemie saamgebind)

500 ml droë witwyn

500 ml hoenderaftreksel

sout en varsgemaalde peper

’n hand vol vars salie

Smelt die botter en 1 e van die olyfolie in ’n swaarboomkastrol en meng die pancetta daarby. Roer oor ’n matige hitte tot die vet begin uitbraai. Sit die hoenderstukke in die kastrol en braai bruin. Voeg die kappertjiesade, knoffel, bouquet garni en wyn by en laat vir so 15 minute rustig prut voor jy die hoenderaftreksel byvoeg.

Laat prut vir nog 40 minute of tot die hoender heeltemal sag is en die vloeistof tot ’n romerige sous ingekook het.

Verhit intussen die res van die olyfolie in ’n pan en braai die salieblare baie vinnig in die vuurwarm olie. Dreineer die bros salieblare op kombuispapier.

Haal die bouquet garni uit en skep die hoender in ’n mooi vleisskottel. Skep die pancetta-en-kappertjiesaad-sous oor.

Garneer met die bros salie-blare en bedien in sopbakke met romerige polenta (slap Italiaanse mieliepap).

#france #pluimvee