Ierse bredie

Ek het ’n baie eenvoudige bredie gemaak -  jy kan nog groente byvoeg of selfs van die aftreksel met rooiwyn of Guinness vervang. Tradisioneel is Ierse bredie ’n maaltyd op sy eie, maar jy kan dit natuurlik saam met rys of koeskoes voorsit.

Genoeg vir 4.

Jy het nodig:

2 e olie

500 g lamsvleis, in 5 cm-blokkies gesny (jy kan ’n paar bene byvoeg vir ekstra geur)

1 kg aartappels, geskil en in kwarte gesny

1 groot ui, grofgekap

1 bossie preie, in ringetjies gesny

5 groot wortels, in ringetjies gesny

750 ml bees- of lamsvleisaftreksel

2 of 3 koolblare, baie dun gesny (opsioneel)

sout en peper na smaak

Só maak ’n mens:

1. Voorverhit die oond tot 180 °C.

2. Gooi die helfte van die olie in ’n groot braaipan en verhit tot baie warm. Voeg die helfte van die vleisblokkies by en braai tot bruin. Skep die lam uit en plaas in ’n groot oondvaste bak (met ’n styfpassende deksel). Pak die helfte van die aartappels, uie, preie en wortels oor die vleis.

3. Verhit die res van die olie in die pan en braai die res van die vleis tot bruin. Plaas in die oondvaste bak en herhaal die groentelae.

4. Giet die aftreksel oor, sit die deksel op en plaas in die oond vir ’n uur. Voeg dan die kool by (indien verkies), sit weer die deksel op en plaas terug in die oond vir nog ’n uur. Loer elke nou en dan om seker te maak die vloeistof kook nie te veel weg nie. Voeg ’n bietjie kookwater by as jy bang is dit kook te droog. Die bestanddele moet die heeltyd deur vloeistof bedek wees. As die sous aan die einde van die kooktyd van twee ure te loperig is, haal die deksel af en los nog ’n rukkie in die oond. Proe en geur met sout en peper na smaak. Jy kan die bredie onmiddellik geniet, of jy kan dit berei tot twee dae voordat jy dit wil voorsit.

– Aangepas vanaf britishfood.about.com.​

#ierland