Reënboog-broodjies
- The Rainbow Team
- Feb 7, 2015
- 1 min read
(sowat 36 driehoek-broodjies)
Twee gesnyde witbrode
Tuna-laag
3 blikke tuna
75 ml tamatiesous
60 ml mayonnaise
200 g (218 ml) botter, saggemaak
sout en varsgemaalde swartpeper na smaak
Dreineer die tuna. Gooi die tuna, tamatiesous, mayonnaise en sagte botter in jou voedselverwerker. Meng tot ’n gladde pasta. Skep uit en geur met sout en swartpeper. Maak nou die eier-vulsel.
Eier-laag
6 hardgekookte eiers
240 g (600 ml) cheddarkaas, fyngerasper
60 ml mayonnaise
200 g (218 ml) botter, saggemaak
sout en varsgemaalde swartpeper na smaak
100 g fyngekapte pistasieneute (opsioneel)
Plaas die hardgekookte eiers, cheddarkaas, mayonnaise en botter in jou voedselverwerker. Meng tot ’n gladde pasta. Geur met sout en swartpeper.
Broodjies
Om die broodjies aanmekaar te sit gebruik drie snye brood op ’n slag. Smeer van die tuna lekker dik op die eerste sny. Maak toe met die tweede sny. Smeer van die eier op die tweede sny en sit die derde sny bo-op. Herhaal tot al die snye brood gebruik is. Maak die broodjies toe met tinfoelie en plaas in die yskas. Net voor jy hulle bedien, sny jy die korsies af. Sny elke broodjie in vier. Druk een kant van elke broodjie in die fyngekapte pistasieneute.
Wenk
Hoe kry ek my botter sag? Plaas afgemete botter in ’n mikrogolf-veilige bakkie in jou mikrogolfoond. Stel dit op ontdooi en tel tot twaalf voor jy die botter uithaal.
Comentarios