Volstruispotjie

‘n Nommer 10-pot is perfek, want dit werk makliker as die kleiner potjies. Hierdie resep vul die pot ongeveer halfpad.

2.5 kg volstruisnek

2.5 kg volstruisstuitjie

500 g gerookte spek

30 ml kookolie

½ koppie olyfolie

8 preie (leeks), gesny

4 gekapte uie

4 chilies

8 knoffelhuisies

takkie vars roosmaryn

500 g bruin sampioene, gesny

2 eetlepels groen peperkorrels

½ koppie brandewyn

2 koppies Old Brown Sherry

1 ½ bottel goeie rooiwyn, verkieslik Karusa Pinotage

(drink die ander helfte met ‘n oop gemoed)

½ koppie suurlemoensap

4 blokkies hoenderaftreksel

20 klein piekeluie

10 klein gesnyde wortels

1 kg baba-aartappels

2 pakkies jong groente

(baby squash, baby marrow en patty pans)

2 bossies spinasie, gewas en fyn gekerf

2 eetlepels koekmeel

500 ml suurroom

knypie neutmuskaat

1 liter vars room

sout en peper na smaak

Meng die nek en stuitjie en plaas in ‘n plastiekbak - ‘n 5 liter-roomysbak

is ideaal.

Voeg olyfolie by en meng goed.

Gooi rooiwyn en suurlemoensap oor die vleis en bêre oornag in yskas.

Probeer om die bak so nou en dan om te keer sodat wyn en olie orals bykom. Verhit die kookolie in die pot en braai die vleis bietjies-bietjies tot bruin.

Haal uit en sit eenkant.

Braai nou die uie, preie, roosmaryn, chilies en groen peperkorrels. Voeg gerookte spek by braai nog.

Voeg die vleis weer by.

Verhit die brandewyn en sjerrie en voeg om die beurt by.

Om grênd te wees en as jy ‘n gehoor het, kan jy altyd dan die alkohol binne-in die pot aan die brand steek.

Die Franse noem dit flambé.

Voeg dan al die wyn en olie by wat nog in die roomysbak is.

Meng die hoenderblokkies met 500 ml kookwater en voeg ook by.

Knoffel kom laaste by.

Sit die deksel op en prut oor baie lae hitte vir 2½ uur.

Groente kom nou laag vir laag by.

Eers die aartappels, dan die wortels en laat prut vir nog 15 minute.

Voeg nou weer laag vir laag die jong groente en dan sampioene by.

Prut nog 10 minute met deksel op.

Intussen gooi jy die gekerfde spinasie blitsig in kokende water en dreineer dadelik.

Meng die suurroom en koekmeel met die gaar spinasie.

Voeg ‘n liter vars room by die pot.

Skep die spinasiemengsel oor alles, en prut met die deksel op vir nog 10 minute. Proe maar gedurig en voeg sout by soos die lus jou lei.

Bedien met stampmielies of jasmynrys of cous-cous - of mieliepap as jy

dalk van die Transvaal af kom.

Bedien saam met jou gunsteling slaaie.

#erf #volstruis #potjiekos