Sjokolade-koffietert

Kors

200 g sjokoladekoekies (ek het Romany Creams gebruik), fyn gekrummel

100 ml gesmelte botter

Vulsel

625 ml volroommelk

45 ml kitskoffiepoeier van goeie gehalte

1 x 397 g blik kondensmelk

80 ml mielieblom

60 ml melk

4 eiergele

50 g botter, in blokkies gesny

10 ml vanieljegeursel

Bolaag

250 ml room

100 g donker sjokolade, gekap

Vir die kors: Meng die koekiekrummels en gesmelte botter goed saam. Druk die krummelmengsel op die boom en teen die kante van ’n middelslag gesmeerde tertbord en verkoel tot nodig.

Vir die vulsel: Verhit die melk, koffiepoeier en kondensmelk saam tot net onder kookpunt. In ’n ander bak, meng die mielieblom en 60 ml melk tot glad en klits die eiergele by. Voeg die helfte van die kokende melkmengsel by die eiergeelmengsel en klits goed. Giet terug in die kastrol en verhit oor lae hitte terwyl geroer word tot kookpunt. Prut, terwyl jy roer, vir ongeveer vier minute tot verdik en gaar. Verwyder van die hitte en roer die botter en vanieljegeursel by. Giet die mengsel in ’n bak, bedek met kleefplastiek en laat vir 20 minute afkoel. Skep die vlamengsel in die tertkors en smeer gelyk. Verkoel vir twee uur.

Vir die bolaag: Verhit 125 ml van die room saam met die sjokolade oor lae hitte tot glad. Laat afkoel tot kamertemperatuur. Klits die orige 125 ml room styf en vou by die sjokoladesous in. Skep op die gestolde tert en rond af met sjokoladeskaafsels. Lewer 12 porsies.

#coffee #chocolate #tert