Skilpadjies

Dié heerlike lewer in netvet-happies is op hul lekkerste sommer net so van die kole af.

■ 1 skaaplewer

■ Sout en vars gemaalde swartpeper

■ Genoeg netvet (caul fat)

Verwyder die vlies om die lewer en sny die buise en harde dele weg. Sny die lewer in stukkies – nie dikker as 2 cm en 7 cm tot 10 cm lank nie. Bestrooi liggies met sout en peper. Sny die netvet ook in blokkies met ’n skerp mes of skêr – groot genoeg om een en ’n half keer om ’n stukkie lewer te draai. Vou die netvet styf om die lewer en pak in ’n plastieksakkie of bak (jy kan dit met peuselstokkies vassteek as jy wil, hoewel ek dit nooit doen nie).

Bedek en bêre in die vrieskas tot jy dit wil gebruik. Ontdooi die skilpadjies in die yskas. (Maak seker dit is heeltemal ontdooi voor jy dit gebruik.) Braai oor vinnige kole en bestrooi weer liggies met sout en peper terwyl jy braai. Belangrik: Moenie skilpadjies oorgaar maak nie – die netvet moet bros wees, maar as die lewer te gaar word, word dit droog en taai. Toets een deur dit met ’n mes deur te sny. Die pienkerigheid in die middel moet net-net weg wees, dan is dit reg om te eet. Lewer ongeveer 25 skilpadjies.

#skilpadjies #namakwa #liver #erf #braai