Skuinskoek

Skuinskoek is 'n gisbrood-lekkerny wat veral in die Noord-Kaap en Karoo gewild is. Hier is 'n kortpad-weergawe.

Deeg

■ 1,25 kg koekmeel

■ 125 g sagte botter

■ 375 ml strooisuiker

■ 1 1/2 pakkie (15 g) kitsgis

■ 1 ml fyn gemmer

■ 1 ml fyn kaneel

■ 15 ml anyssaad

■ 5 ml sout

■ 500 –750 ml louwarm water

■ Olie, vir diepbraai

Stroop

■ 250 ml suiker

■ 375 ml water

Sit die meel in ’n groot bak en vryf die botter daarby in. Voeg die suiker, gis, speserye en sout by en meng goed. Maak met net genoeg louwarm water aan om ’n hanteerbare deeg te vorm. Knie die deeg goed tot glad en elasties. Sit in ’n geoliede bak en bedek losweg. Laat rys op ’n warm plek tot verdubbel in volume. Knie die deeg af en rol 2,5 cm dik uit op ’n meelbestrooide oppervlak. Sny die deeg horisontaal in 2 cm wye repe. Sny dan oorkruis, weer horisontaal en in 2 cm repe, sodat jy klein diamantvormige koekies het. Vir die stroop: Verhit die suiker en water saam tot die suiker opgelos is. Verhit tot kookpunt en kook vinnig vir 5 minute. Hou eenkant. (Jy gebruik die stroop louwarm.) Braai lotte van die koekies in warm olie tot diep goudbruin en deurgaar. As jy dit in stroop dompel, lig dit uit die olie, dompel vinnig in die stroop en skep dan uit op ’n draadrak wat bo-op ’n skinkbord staan. As jy die koekies net so wil voorsit, skep dit uit op kombuispapier om te dreineer. Lewer ongeveer 65 koekies.

#namakwa #skuinskoek #bread #pastry #erf