Suurkos

Blokkies sagte lewer en niertjies in ’n suursousie is tradisionele boerekos.

Jy kan die gereg natuurlik ook met wildslewer maak. Dié resep kom ook uit Hetta van der Merwe se kombuis.

■ Lewer, niertjies en vetderm van een skaap

■ 30 ml olie

■ 1 ui, grof gekap

■ 500 ml kookwater, of meer

■ 45 ml koekmeel

■ 45 ml asyn

■ 45 ml suiker

■ Sout en vars gemaalde swartpeper na smaak

Trek die lewer en die niertjies se vliese af en sny enige buise uit. Sny die lewer en niertjies in blokkies en sny die vetderm in 1 cm-stukkies.

Verhit ’n bietjie olie in ’n kastrol en braai die ui en vetderm saam tot die vetderm bros is. Voeg die lewer en niertjies by en braai effens. Voeg genoeg kookwater by om dit te bedek en verhit tot kookpunt. Bedek en laat prut oor stadige hitte vir sowat 20 minute.

Meng nou die koekmeel, asyn en suiker saam en voeg by die sous (voeg nog ’n bietjie kookwater by indien die sous al baie afgekook is). Verhit tot kookpunt, prut vir 3 minute en sit voor. Lewer vier porsies.

#namakwa #liver #suurkos #stew #kidney #offal