Suurribbetjie

Suurrib is ‘n lekker resep om vooruit te maak as jy op vakansie of ‘n staptog gaan, want die asyn bewaar die vleis vir langer. Die oorspronklike resep het ‘n ontbeende skaaprib gebruik, wat gerol is voor dit in die oond gerooster is. Ek het besluit om dit nie te ontbeen nie en liewer stadig oor die kole te braai. Ek het verouderde asyn uit Prins Albert gebruik en die kerriepoeier is deur my man aangemaak, maar jy kan enige goeie asyn of jou gunsteling klaargekoopte kerriemengsel gebruik. Die asyn-kerrie-en-appelkooskonfyt kombinasie is erg tradisioneel, maar jy kan gerus met ander geure eksperimenteer deur bv koljander, kaneel, gemmer en neut te gebruik of enige ander kruiemengsel van jou keuse.

4-6 porsies

1 skaapribbetjie

25ml fyngestampte koljander

2.5ml fyn gemmer

5ml kerriepoeier

Knippie peper

250ml asyn

Sout na smaak

15ml appelkooskonfyt

Vryf die koljander, gemmer, kerrie en peper goed in die vleis in, sit dit plat in ‘n skottel en gooi die asyn daaroor. Laat dit vir 2 dae so lê terwyl dit intussen af en toe omgekeer word. Moenie sout oor die vleis gooi nie, haal die ribbetjie na twee dae uit die sous, was dit skoon af, strooi sout oor en smeer die konfyt eweredig oor die vleis. Braai stadig oor die kole tot gaar of rooster in matige oond vir ongeveer 30min. Bedien dadelik.

#namakwa #ribs #lamb #braai