Basiese pienkskuimpoeding met Ideal-melk

genoeg vir 6

Dis belangrik dat die Ideal-melk yskoud moet wees, anders kan jy dit nie klop nie. Sit die blikkie oornag in die yskas.

15 ml (1 e) poeiergelatien

30 ml (2 e) water

22 g (1 pakkie) aarbeijellie

400 ml (1 blik) koue Ideal-melk

410 g (1 blik) koejawels, gedreineer

1 Sprinkel die gelatien oor die water en laat spons vir 5 min.

2 Maak die jellie volgens die aanwysings op die pakkie aan.

3 Smelt die gelatien op die ontvriesstelling in die mikrogolf. Meng deur die jellie.

4 Klop die Ideal-melk styf. Meng die helfte deur die jellie en vou die res in.

5 Verwerk die koejawels in ’n voedselverwerker. Vou deur die poeding.

6 Spoel ’n 2 liter-jellievorm met koue water uit en gooi die mengsel hierin. Laat set vir 2 uur of oornag in die yskas.

7 Keer uit voor opdiening.

VARIASIES:

Groen Skuimpoeding

genoeg vir 6

Vervang die aarbeijellie in die basiese resep deur groen jellie. Vervang die koejawels deur geblikte pere. Meng die fyn gerasperde skil van 1 lemmetjie by.

Geel skuimpoeding

Vervang die aarbeijellie in die basiese resep deur pynappeljellie. Vervang die koejawels deur 2 x 110 g-blikke grenadellapulp. Meng die fyn gerasperde skil van 1 lemoen by.

Lemoenskuimpoeding

genoeg vir 6

4 eiers, geskei

90 ml (¼ k + 2 t) suiker

180 ml (¾ k) lemoensap

fyn gerasperde skil van ½ lemoen

fyn gerasperde sap en skil van ½ suurlemoen

knypie sout

30 ml (2 e) kookwater

1 Klop die eiergele tot baie dik en skuimerig. Klop die helfte van die suiker daarby. Roer die lemoensap en -skil en suurlemoensap en -skil by.

2 Gooi die sout en kookwater versigtig by.

3 Sit oor kokende water en roer met ’n houtlepel tot die mengsel dik is. Verkoel.

4 Klop die eierwitte styf, voeg die ander helfte van die suiker by en klop tot glansend. Vou die eierwitte by die lemoenmengsel in.

5 Spoel ’n ronde jellievorm met ’n inhoudsmaat van 1 liter met koue water uit. Gooi die mengsel hierin en laat stol vir 3 uur of oornag.

#bazaar #pudding #idealmilk