Gebakte vis in 'n warm roomsous

Genoeg vir 4

Vir die aartappels

4 groot aartappels

45 ml (3 e) olyfolie

Sout en varsgemaalde swartpeper, vir smaak

Vir die dille-sous

1 sjalot, fyn gekap

1 knoffelhuisie, gekap

60 ml (¼ k) droë witwyn

Sap van 1 suurlemoen

60 ml (¼ k) vars dille, fyn gekap

10 ml (2 t) Dijon-mosterd

125 ml (½ k) vars room

45 ml (3 e) botter, in blokkies gesny

Sout en varsgemaalde swartpeper, vir smaak

800 g geelstert, skoongemaak

30 ml (2 e) olyfolie

2 suurlemoene, gesny

1. Kook die aartappels in genoeg soutwater. Verwyder sodra gaar, dreineer en sny in kwarte. Voorverhit die oond tot 180°C.

2. Plaas die aartapples op 'n bakplaat en besprinkel met olie en geur na smaak. Bak tot goudbruin en krakerig, vir ongeveer 15 minute.

3. Vir die sous: kombineer die sjalot, knoffel, wyn en suurlemoen en bring tot kookpunt. Roer die dille by en kook vir een minuut. Roer die mosterd en room by en kook vir nog 'n minuut. Roer die botter by, een blokkie op 'n slag, totdat al die botter gesmelt het.

4. Geur na smaak.

5. Plaas die vis in foelie - geur goed en plaas suurlemoenskyfies bo-op. Maak toe met foelie. Bak vir 20 minute.

6. Bedien die vis saam met die aartappels en warm dille-sous.

#fish #cream