Baksakkie-skaapboud

As jy goeie skaapvleis het, is skaapboud op sy lekkerste met net die nodige sodat die geur van die vleis na vore kan kom.

Ek het nog nooit skaapboud in ’n baksakkie gaargemaak nie, maar nadat ek dié resep probeer het, gaan ek dit van nou af só gaarmaak. Smulsag en sappig.

■ 1 skaapboud van ongeveer 3 kg

■ Olyfolie

■ Seesout en vars gemaalde swartpeper

■ 125 ml blatjang

Voorverhit die oond tot 160°C. Smeer die skaapboud goed met olyfolie, besprinkel ruimskoots met seesout en swartpeper, en smeer oraloor met blatjang. Sit die boud in ’n baksakkie en bind deeglik toe.

Gebruik ’n sosatiestokkie om ’n paar klein gaatjies aan die bokant van die baksakkie te maak sodat die stoom kan ontsnap. (Dit moenie so groot of laag wees dat vloeistof kan uitlek nie.) Bak vir 2½ uur tot 3 uur tot die vleis effens meegee en sag voel wanneer jy met jou vinger op die dikste deel van die boud druk. Haal die boud uit die oond uit en laat staan vir minstens 20 minute in die baksakkie.

Haal die boud uit die sakkie en sit dit op ’n bakplaat of opdienbord. Verbruin dit vinnig onder ’n warm oondrooster, as jy wil. Laat rus vir 10 minute voor jy dit sny. Gebruik die orige vloeistof in die baksakkie om ’n vleissous te maak om daarby te bedien. Lewer 8-10 porsies.

#legoflamb