Beesstert

Beesstert is deesdae effens aan die duur kant. Janet du Plessis van Tamboerskloof in Kaapstad rek dit met stukkies stowebeesvleis.

Genoeg vir 4-6 mense

Bereiding: 20-30 minute

Gaarmaaktyd: sowat 4 uur

30 ml (2 e) olyfolie

1 kg beesstert, in stukke gesny

500 g stowebeesvleisstukkies

(opsioneel)

koekmeel, met sout en peper gegeur

sout en vars gemaalde swartpeper

2 chorizo-worsies, in ringe gesny

(opsioneel)

2 uie, grof gekap

2 knoffelhuisies, gekneus

1 groen soetrissie, ontpit en in blokkies

gesny

15 ml (1 e) vars origanum of 10 ml

(2 t) droë roosmaryntakkies

500 ml (2 k) water

1-2 blikke (410 g elk) gekapte

tamaties

3 aartappels, in kwarte gesny

suiker na smaak

30 ml (2 e) vars origanum

Verhit die helfte van die olie, rol die vleis in die gegeurde koekmeel en braai die vleis in sarsies tot goudbruin.

Geur met sout en peper.

Skep die vleis uit en verhit die res van die olie.

Braai die worsies, uie, knoffel en soetrissie ’n minuut en skep die vleis terug saam met die uimengsel.

Geur met die kruie, voeg die water en tamaties by en laat prut die vleis sowat 4 uur of tot sag.

Voeg die aartappels by sodra die vleis sag is en laat prut nog sowat 30 minute tot die aartappel gaar is. Geur met sout, peper en ’n knippie suiker. Garneer met origanum en sit voor met rys en ’n groenslaai.

Wenk:

Koop kleiner stukkies beesstert; dit kook vinniger sag.

#oxtail #randrekker