Glutenvrye saadjiebrood

ALETTA LINTVELT

Hiérdie broodjie maak my baie opgewonde. Dis nie soet nie, heeltemal glutenvry en beslis meer aan die “gesonde” kant van die skaal. Die kosskrywer Sarah Britton het die resep ontwikkel en ek het dit op haar kosblog, My New Roots, raakgelees.

Die brooddeeg word nie geknie nie en dit rys ook nie – jy meng bloot ’n klompie sade bymekaar en laat dit staan om te uit swel voordat jy dit bak. Vandat ek dit die eerste keer gemaak het, kan ek nie genoeg daarvan kry nie. Ek eet dit met lekker sout plaasbotter en ’n skyfie kaas. Nou die dag het ek skyfies van die brood gerooster en dit voorgesit saam met ’n potjie olyf-tapenade – ’n wen kombinasie!

Sarah gebruik 1½ koppie hawermout in haar weergawe van die brood, maar ek het dit vervang met ander sade en neute omdat ek (ook) tans op Tim Noakes se dieet is en stysel moet vermy. Jy kan ook gerus eksperimenteer – sorg net dat die verhouding van sade tot water dieselfde bly en moenie die psilliumsaaddoppies weglaat of met iets anders vervang nie, dit is wat die brood bind.

Maak 1 brood

Voorbereityd 15 minute plus 2 uur rustyd

Gaarmaaktyd 50 minute

Jy benodig

4 eetlepels psilliumsaaddoppies

4 eetlepels sesamsaad

½ koppie klapper

1 koppie vlassaad

½ koppie rou haselneute of amandels, gekap

1½ koppie rou sonneblomsade

1 teelepel gekapte tiemie of roosmaryn

1 teelepel sout

350 ml water

1 eetlepel heuning

4 eetlepels gesmelte botter of klapperolie

Só maak jy

Smeer ’n klein broodpan van 22 cm x 12 cm met 1 eetlepel botter. Meng al die droë bestanddele in ’n bak. Meng die water, heuning en laaste 3 eetlepels botter, en meng dit met die droë bestanddele. (Voeg nog 1-2 eetlepels water by indien dit te moeilik meng.) Krap die mengsel in die broodpan en bedek dit met kleefplastiek. Laat dit vir 2 ure (of oornag) staan.

Voorverhit die oond tot 175 °C. Bak die brood vir 20 minute. Dop die brood uit die pan en plaas dit onderstebo op ’n oondrakkie. Bak dit vir nog 35-40 minute in die middel van die oond. Die brood is reg wanneer dit hol klink as jy daarop klop. Die brood moet heeltemal afkoel wees voordat jy dit sny.

WENK As jy die brood in kleefplastiek toedraai, behoort dit tot 5 dae in ’n lugdigte houer te hou. Jy kan ook individuele snye vries en net weer in die broodrooster verhit soos benodig.

#psilliumseed #sesameseed #coconut #flaxseed #hazelnut #sunflowerseed #honey #rosemary #coconutoil