Karamelpiesangbrood

ALETTA LINTVELT

My ma is nie die mees bedrewe kok nie, maar sy maak wel ’n heerlike piesangbrood. Soveel so dat my dogter, Rizzia, haar neus vir myne optrek. Ek vermoed sy gebruik ’n Wenresepte-boek se resep, maar maak nie saak hoeveel resepte ek al probeer het nie, myne kom net nooit so fyn en geurig uit soos hare nie. Dalk is dit omdat ek nooit my piesangs so lank laat lê en ryp raak nie…

Steeds, dit keer my nie om byna elke piesangbroodresep wat ek op afkom te toets en dan aan Rizzia voor te lê vir kommentaar nie. Op die oomblik is hierdie minder soet broodjie ons albei se gunsteling. Laat weet my wat julle dink!

Maak 1 broodjie

Voorbereityd 20 minute

Gaarmaaktyd 1 uur

Jy benodig

1½ koppie fyn piesang (3-4 piesangs)

1 groot eier

6 eetlepels botter, saggemaak

¾ koppie ligbruin suiker

1 teelepel vanieljegeursel

1¼ witmeel

1 teelepel bakpoeier

½ teelepel sout

½ koppie sagte toffies (Wilsons Cream Caramels), fyngekap of gerasper

Só maak jy

Voorverhit die oond tot 170 °C. Smeer 1 broodpan van 22×12 cm.

Druk die piesangs fyn en meng dit met die eier, botter en suiker. Meng die droë bestanddele daarby tot net gemeng. Roer die gekapte toffies deur.

Krap die mengsel in die broodpan uit en bak dit vir 60-70 minute of totdat die brood goudbruin is en ’n toetspen skoon uitkom. Laat dit vir 10 minute in die pan afkoel voor jy dit uitkeer. Laat die broodjie dan heeltemal afkoel voor jy dit sny.

#caramel #bananabread