Mielieroosterkoek en mosterdkaassous

ALETTA LINTVELT

Vir 8

Voorbereityd 20 minute, plus rystyd

Gaarmaaktyd 20 minute

Die staatmaker Roosterkoek met wors.

Die kinkel Gegeurde mielieroosterkoek met ’n mosterdkaassous.

Jy benodig

• 4 koppies broodmeel

• 1 sakkie (10 g) kitsgis

• 1 teelepel sout

• 1 koppie louwarm water

• 1 groot hand vol pietersielie of basilie, fyngekap

• 12 sondroogtamaties, fyngekap

• 2 groot hande vol cheddar, gerasper

• ½ koppie heelpitmielies

Vir die mostertsous

• 1 koppie melk

• 1 eetlepel mielieblom

• 2 eetlepels water

• ’n knippie rooipeper

• 1 eetlepel heelkorrelmosterd

• 2 hande vol cheddar, gerasper

• sout na smaak

Vir die wors

• 3 eetlepels heuning

• 6 eetlepels sojasous

• ½ teelepel knoffel, fyngekap

• 500 g hoender- of varkwors

Só maak jy

1 Maak die roosterkoeke: Meng die meel, gis en sout met die louwarm water totdat dit ’n slap deeg vorm. Knie dit vir 10 minute, bedek dit en laat dit dan eenkant staan sodat die deeg kan rys tot dubbel die volume. Knie die deeg af en verdeel dit in 8 plat, ronde stukke.

2 Meng die kruie, tamatie, kaas en mieliepitte saam en verdeel dit tussen die 8 deegsirkels. Vou die deeg om die vulsel en vorm ’n plat, ronde roosterkoek.

3 Laat die deegbolle vir 20 minute onder ’n doek staan sodat dit weer effens kan uitrys. Braai dit oor warm kole tot goudbruin en gaar.

4 Maak die mosterdsous: Verhit die melk in ’n potjie tot kookpunt. Meng die mielieblom met die water en roer dit deur die melk. Hou aan roer totdat dit verdik (as jy dit dikker verkies, kan jy nog ’n bietjie mielieblom oplos en deurroer).

5 Verlaag die hitte en voeg die rooipeper, mosterd en kaas by, en haal dit van die hitte af. Proe en voeg sout na smaak by.

6 Braai die wors: Meng die heuning, sojasous en knoffel en gooi dit oor die wors. Braai dit in ’n pan of oor warm kole tot gaar, en sny dit dan in stukke. Skep die wors op die warm rolletjies en skep van die mosterdsous bo-oor.

#roosterkoek #mustard #cheese #sausage