SOMERSET VARKKASSEROL

Petro Graythorn van Bellville noem dit haar

‘‘pak-alles-in-een-skottel-en-bak-gereg’’. Sy

het die resep jare gelede by ’n Britse vriendin

gekry en intussen so ’n bietjie daaraan verander,

maar dit bly steeds ’n wenner.

Genoeg vir 2-4 mense

Bereiding: 30 minute

Gaarmaaktyd: 1-1½ uur

30 ml (2 e) botter

3 appels, ontpit en in dun skywe gesny

2 uie, in skywe gesny

10 ml (2 t) suiker

10 ml (2 t) droë salie

4 groot varktjops, sonder swoerd

50 ml meel, met sout en peper gegeur

125 g knopiesampioene, in kwarte gesny

50 ml witwynasyn

100 ml hoenderaftreks

80 ml (1/₃ k) vars broodkrummel

125 ml (½ k) cheddarkaas, gerasper

Voorverhit die oond tot 160 °C.

Smelt 10 ml van die botter en smeer ’n middelslagoondbak daarmee.

Rangskik die helfte van die appel- en uiskywe op die boom.

Geur met suiker en salie.

Bestuif die tjops met gegeurde meel en pak dit bo-op die appels en uie.

Rangskik die sampioene bo-op die tjops, gevolg deur die res van die appels en uie. Giet die asyn en aftreksel bo-oor, meng die krummels en kaas en sprinkel bo-oor. Stippel die res van die botter bo-oor.

Bak onbedek sowat 1-1½ uur tot die vleis sag is en sit voor met ’n groenslaai.

#pork #casserole