Aartappelsop met geroosterde knoffel en pecorino

Jy benodig:

1 knoffelbol

3-4 middelgroot aartappels, geskil en gekook tot net sag

¼ koppie botter

¼ koppie meel

1 ui, gekap

1 liter hoender- of groenteaftreksel

1 koppie melk

½ koppie room

vars tiemie na smaak

½ koppie varsgerasperde pecorino

sout en peper na smaak

Só maak ’n mens:

1. Voorverhit die oond tot 190 °C. Sny die bokant van die knoffelbol af sodat jy van die huisies kan sien. Vryf ook die meeste skil van die buitekant van die bol af. Drup ’n bietjie olyfolie en sout en peper oor die knoffelbol. Draai dit dig toe in foelie en plaas op ’n bakplaat. Bak 40-45 minute tot gaar. Laat afkoel en dop dan die individuele knoffelhuisies uit. Dit sal baie maklik loskom en sal ’n mooi goudbruin kleur hê.

2. Smelt die botter in ’n groot kastrol oor matige hitte. Braai die uie so drie tot vier minute tot deurskynend.

3. Voeg die meel by en roerbraai ’n minuut. Moenie dat die meel bruin braai nie.

4. Roer die aftreksel, melk, room, sout en peper by en laat die sop opkook. Verlaag die hitte en prut twee tot drie minute. Roer ’n paar keer.

5. Sny die gaar aartappel in blokkies en roer dit saam met die knoffel (sowat nege huisies) en gerasperde pecorino by die sop. Laat sowat tien minute stadig oor lae hitte prut.

6. Versap die sop in jou versapper tot glad – of gebruik ’n handversapper. Sit die sop warm voor saam met ekstra gerasperde pecorino en lekker brood van jou keuse.

#potato #soup #sop #pecorino #garlic