Dubbelsjokolade-koekies

Enige sjokolade-liefhebber sal swig voor dié koekies. Jy kan self besluit of jy lekker groot, oordadige koekies of meer beskeie koekies wil bak. Myne was iets tussenin en ek het drie dosyn uit die beslag gekry. Die bestanddele het my sowat R70 gekos (ek het reeds sout en bakpoeier in my koskas gehad).

Jy het nodig:

230g botter by kamertemperatuur

1¼ k suiker

2 groot eiers

½k kakao

2¼k meel

¼t sout

1t bakpoeier

1 pakkie (250g) sjokolade-splinters

Só maak ’n mens:

1. Voorverhit die oond tot 180°C. Voer bakplate met kleefwerende bakpapier uit.

2. Klits die botter en suiker met ’n elektriese klitser saam tot lig – sowat 3 minute lank.

3. Klits die eiers een vir een by; klits goed na elke byvoeging. Klits die kakao by tot goed gemeng.

4. Meng die meel, sout en bakpoeier saam en klits dit op lae spoed by die ander bestanddele tot net gemeng. Vou die sjokolade-splinters met ’n deegskraper in. Skraap ook sommer die kante van die bak om seker te maak die deeg is behoorlik gemeng.

5. Rol die deeg in balletjies van jou keuse. Jy kan monster-koekies maak of net ’n teelepel vol deeg op ’n keer. Pak die balletjies op die voorbereide bakplate en druk effens plat. Bak 16-20 minute.

Laat 5 minute afkoel op die bakplate en pak dan op ’n draadrak om heeltemal af te koel.

#chocolate #cookies #kleinkoekies