Gepiekelde geelstert met botterskorsie-puree en komkommer

Genoeg vir 4 as ’n voorgereg.

Jy benodig:

Vir die gepiekelde vis:

400 g Suid-Afrikaanse geelstert

200 ml witwyn

200 ml water

200 ml witwynasyn

15 ml ponzu (of suurlemoensap)

15 ml heuning

15 ml witsuiker

3 ml grofgemaalde swartpeper

1 lourierblaar

Die res:

500 g botterskorsie, geskil

en gekap

’n knypie sout en peper

100 ml volroommelk

50 g botter

½ komkommer, in dun

repies gesny

4 baba-vinkelknolle, middeldeur ­gesny

’n skeut of twee olyfolie

½ bossie spinasiebeet (chard),

dun gesny en besprinkel met

suurlemoensap

Só maak ’n mens:

1. Om die piekelvis te maak: Plaas die witwyn, water, asyn, ponzu, heuning, suiker en speserye in ’n kastrol wat groot genoeg is sodat die vis ook daarin sal pas, en laat opkook. Sodra dit kook, verwyder van die hitte en plaas die vis in die kastrol. Laat 5 minute staan en skep dan die vis uit en draai dit styf in kleefplastiek toe. Plaas in die yskas tot koud – dit is dan reg om voor te sit.

2. Om die botterskorsie-puree te maak: Plaas die botterskorsieblokkies in ’n kastrol, gooi genoeg kookwater oor om dit te bedek en kook tot sag. Dreineer.

3. Voeg die melk, botter, sout en peper by en verwerk tot glad met ’n handmenger of in jou voedselverwerker.

4. Drup olyfolie oor die baba-vinkel en rooster in ’n warm riffelpan tot effens sag. Sit die vis voor saam met die botterskorsie-puree, die spinasiebeet, komkommer-repies en baba-vinkel.

Foto: Seline van der Wat

#pickledfish #ponzu #honey #butternut #cucumber #fennel #chard