Griekse lamsboud

Dié eg landelike oondgebakte lamsboud word in Griekeland op Sondae voorgesit as ’n simbool van herontmoetings. Die aartappels absorbeer die olyfolie en kruiegeure.

Maak 4 porsies.

Bestanddele:

2 heel knoffelbolle, huisies geskil

1,5 kg lams- of skaapboud

2 uie, grofgekap

60 ml olyfolie

sout en peper

2 suurlemoene

takkie elk tiemie en roosmaryn

’n paar lourierblare

1,5 kg aartappels, geskil en in groot stukke gesny

2 groot tamaties, in kwarte gesny

30 ml botter (opsioneel)

Só maak ’n mens:

1. Voorverhit die oond tot 180 °C. Maak kepies in die vleis en druk ’n knoffelhuisie in elke snytjie. Plaas die uie op die boom van ’n oondpan en besprinkel dit met olyfolie. Geur die vleis met sout en peper, plaas dit bo-op die uie, bedruip dit met die sap van 1 suurlemoen en gooi die kruie by.

2. Giet 20 ml olyfolie en 200 ml water oor. Bak in die oond vir sowat 40 minute. Meng die aartappel en die oorblywende olyfolie en suurlemoensap en voeg dit by die vleis saam met nog 200 ml water.

3. Bak nog 20 minute. Pak die tamaties in die oondpan en stip met botter. Bak totdat die vleis gaar en die aartappels sag is.

Foto: Samarie Smith

#greek #legoflamb #thyme #rosemary #bayleaf #potato #tomato