Hertzoggie resep

Die resep kom van my ouma (Sophia Krapohl) – sy het my en my ma leer Hertzoggies maak.

Ek het die koekies al gemaak in ’n klein kolwyntjiepannetjie, want dan is dit ’n lekker happiegrootte wat ekstra-mooi lyk langs ’n koppie tee.

Die heel eier word gebruik om die bolaag te maak, nie net die wit nie. Heerlik!

Kors

• 250 ml mielieblom

• 500 ml koekmeel

• 250 ml bruismeel

• 2,5 ml sout

• 250 g botter

• 125 ml koue water

Meng die droë bestanddele en vryf die botter in met jou vingers. Meng net genoeg koue water by om ’n stewige deeg te vorm. Rol dun uit op ’n meelbestrooide werkoppervlak en sny in sirkels, so groot soos jy verkies. Plaas in ’n kolwyntjie-pannetjie (van jou keuse), goed gespuit met kleefwerende kossproei. (Niks brand so erg aan soos konfyt wat uitloop nie!) Vul elke deegsirkel met tuisgemaakte appelkooskonfyt. (Vir ‘n lekker variasie kan jy karamel- kondensmelk gebruik pleks van die konfyt.)

Bolaag

• 125 g botter

• 250 ml suiker

• 4 eiers

• 500 ml klapper

• knippie sout

Klits die botter en suiker saam tot lig en romerig. Voeg die eiers by en klits tot goed gemeng. Vou die klapper en sout saam in die mengsel in. Skep lepels vol van die bolaag op die konfyt in die deegsirkels. Plaas die Hertzoggies in ’n voorverhitte oond van 180 °C. Bak ongeveer 15 – 20 minute of tot ligbruin bo-op. Laat effens afkoel.

#hertzoggie #kleinkoekies #southafrica #erf