Hoendervlerkies in 'n lekker taai sous

Jy benodig (vir 4 porsies):

8 (altesame 500 g) hoendervlerkies, vlerkpuntjies afgesny

ongeveer 30 ml meel

5-10 ml sonneblomolie

1 klein (sowat 50 g) ui, gerasper

5 ml knoffel, gekap (opsioneel)

50 ml Worcestersous

50 ml tamatiesous

50 ml heuning

10 ml Engelse mosterd of mosterdsous van jou keuse

Tabasco-sous of rissiepoeier (na smaak)

Só maak ’n mens:

1. Voorverhit die oond tot 200 °C.

2. Hou die vlerkies heel of sny dit by die lit in twee kleiner porsies. Rol dit in koekmeelblom en skud die oortollige meel af. Plaas dit in ’n gesmeerde oondpan.

3. Verhit die olie en roerbraai die ui en knoffel. Roer die Worcestersous, tamatiesous, heuning en mosterd by. Verhit dit tot kookpunt. Giet ’n gedeelte van die warm sous oor die hoendervlerkies.

4. Bak die vlerkies 30 tot 40 minute lank tot gaar. Bedruip die hoendervlerkies deurentyd met die sous terwyl dit bak. Sit dit warm voor of bedien dit yskoud (verkil).

*Variasie:

Soms is hoendervlerkies skaars. Vervang die vlerkies onderskeidelik met 2 tot 4 hoenderboudjies vir 2 porsies of 4 tot 8 vir 4 porsies.

*Hoe kan ek dit bêre?

Bêre die gereg tot 48 uur lank in die yskas of bevries dit tot twee maande. Hou die hoender voortdurend goed verkoel en herverhit dit net een keer om voedselvergiftiging te voorkom.

Foto: Elmarie Knapton

#wings #stickysauce