Jogurt-en-bloubessie-koekies

Bloubessies (ook nou in seisoen, en net R15,95 vir ’n groot pakkie by my groentewinkel) is propvol antioksidante, kalium en vitamien C wat jou risiko van hartsiekte en kanker verlaag. Boonop is dié bessies ook anti-inflammatories.

Dié koekies het lekker baie bloubessies en dit bevat geen botter of margarien nie (Griekse jogurt word in plaas daarvan gebruik).

Om dit ’n ekstra soet skop te gee, drup ’n glaseersel van versiersuiker, vanieljegeursel en melk oor die gebakte koekies.

Maak 3-4 dosyn koekies.

Jy het nodig:

2k meel

1½t bakpoeier

½t koeksoda

¼t sout

1¼k suiker

1¼k Griekse jogurt

1 eier, liggies geklits

die skil van 1 suurlemoen, fyngerasper

1t vars suurlemoensap

½t vanieljegeursel

1¼k vars bloubessies

Vir die vanielje-glaseersel (opsioneel):

1k versiersuiker, gesif

2e melk

1½t vanieljegeursel

So maak ’n mens:

1. Voorverhit die oond tot 180°C. Voer ’n bakplaat met kleefwerende bakpapier uit en bespuit dit ook deeglik met kleefwerende kossproei (die koekies het ’n geneigdheid om vas te sit).

2. Meng die meel, bakpoeier, koeksoda en sout saam in ’n mengbak.

3. Meng die suiker, jogurt, eier, suurlemoenskil en -sap en vanieljegeursel saam in ’n middelslag-mengbak. Voeg die meelmengsel by die jogurtmengsel en meng deeglik. Vou die bloubessies in.

4. Skep opgehoopte eetlepelsvol van die beslag op die voorbereide bakplaat. Spasieer die koekies so 5cm uitmekaar.

5. Bak sowat 12 minute totdat die kante van die koekies net-net begin verbruin. Laat ’n rukkie afkoel en plaas dan op ’n draadrak om heeltemal af te koel.

6. Meng al die bestanddele van die glaseersel tot glad en drup dit oor die koekies. Bêre die koekies in ’n lugdigte houer in die yskas.

#yogurt #blueberries #cookies #kleinkoekies