Poffertjietorings met appel, gemmer en gesoute karamel

Genoeg vir vier.

Jy benodig:

Vir die choux-deeg:

50 g botter

150 ml water

65 g meel

’n knypie sout

2 eiers, liggies geklits

Vir die gemmervla:

3 eiergele

50 g strooisuiker

1 t gemaalde gemmer

20 g meel

250 ml volroom melk

Vir die appelcompote:

2 grannysmith-appels, geskil, stronk verwyder en gekap

100 ml appelsap

Vir die gesoute karamel:

200 ml suiker

4 ml sout

100 ml room

So maak ’n mens:

Die choux-poffertjies:

1. Voorverhit die oond tot 200 °C.

2. Plaas die botter en water in ’n middelslagkastrol en verhit. Sif die meel en sout bo-oor ’n vel bakpapier.

3. Sodra die botter-en-watermengsel begin borrel, verwyder die kastrol van die hitte en keer die meelmengsel vinnig alles op een slag in die kastrol. Klop met ’n houtlepel tot die mengsel bymekaar kom om ’n deegbal te vorm.

3. Plaas terug op die stoof en kook twee minute oor lae hitte. Verwyder van die hitte en laat twee minute lank afkoel.

4. Klits die eiers bietjie vir bietjie by tot ’n gladde en blink pasta vorm. Die mengsel sal lyk asof dit geskif het – hou egter net aan klop. Sodra die pasta gevorm het, skep dit in ’n versiersak.

5. Plaas ’n vel kleefwerende bakpapier bo-op ’n bakplaat en spuit balletjies van die deeg bo-op die papier. Sprinkel ’n bietjie water met jou vingers oor en tussen die deeg. Plaas die bakplaat in die oond en bak 20 minute lank.

6. Sodra die poffertjies gaar en opgepof is, verwyder uit die oond en prik hul onderkante sodat die stoom kan ontsnap. Verlaag die oond se hitte na 180 °C en plaas die bakplaat terug in die oond vir nog vyf minute sodat die poffertjies bros word.

7. Haal uit die oond en laat afkoel.

Die vla:

1. Klits die eiers, suiker, gemmer en meel saam.

2. Verhit die melk in ’n kastrol en klits dit dan baie vinnig by die ¬eiermengsel in – klits vinnig en deeglik sodat jy nie roereier maak nie.

3. Plaas die mengsel terug in die kastrol en kook oor matige hitte terwyl jy aanhoudend roer tot dik. Verwyder van die hitte en laat afkoel. Skep in ’n versiersak.

Die appelcompote:

Kook die appels in die appelsap teen matige hitte totdat die appels fyn is en die sap weggekook het.

Die gesoute karamel:

1. Verhit die suiker in ’n klein kastrol oor matige hitte tot die kante begin verbruin. Roer tot die res van die suiker gesmelt het en die karamel ’n gladde, goudbruin kleur het.

2. Voeg die room by en hou dit fyn dop dat dit nie oorkook nie. Klits dit vinnig oor lae hitte tot glad.

3. Sprinkel die sout by en verwyder van die hitte.

Sit die gereg bymekaar:

Spuit die afgekoelde vla in die choux-deegpoffertjies (spuit dit van onderaf in) en plaas van die grootste poffertjies gereed op opdienborde.

Skep twee teelepels van die appelcompote bo-op die poffertjies en pak dan nog twee poffertjies bo-op die eerste een. Drup die gesoute karamel oor en maak die gereg nog mooier met droë appelskywe as jy soos ’n regte Parysenaar wil voel!

Foto: Leandri van der Wat

#choux #saltedcaramel #compote