Sjokolade-en-mentstafies

Maak 20 stafies.

Jy benodig:

120 g gesoute botter, by kamertemperatuur

100 g strooisuiker

200 g meel

250 g versiersuiker

5 ml pepermentgeursel

Opsioneel: groen voedselkleursel

300 g donkersjokolade

Eetbare goue blinkers, vir bo-oor sprinkel

Só maak ’n mens:

1. Voorverhit die oond tot 180 °C.

2. Klits die botter en suiker saam tot lig en donsig.

3. Voeg die meel geleidelik by en meng totdat dit ’n deeg vorm. Dit sal baie krummelrig wees, maar meng dit saam so goed soos wat jy kan en druk op die bodem van ’n vierkantige 20 cm-pan vas. Maak dit gelyk sodat dit so eweredig as moontlik is. Prik liggies met ’n vurk en bak 10-15 min. tot goudbruin. Laat heeltemal afkoel.

4. Maak die pepermentvulsel deur die versiersuiker te meng met ’n bietjie water om ’n gladde pasta te vorm en roer dan die pepermentgeursel by. Roer ’n paar druppels groen voedselkleursel by as jy wil hê die versiersuiker moet meer soos ment lyk, en smeer dit dan bo-op die beskuitjiebasis.

5. Breek die sjokolade in vierkante en smelt in ’n dubbelkoker. Probeer om nie te veel te roer nie. Sodra dit gesmelt is, giet dit oor die pepermentversiersel. Sny in stafies voordat die sjokolade heeltemal hard geword het. Sprinkel die blinkers oor.

#chocolate #peppermint