Tuna Happies

Jy het nodig (16 balletjies):

1 groot aartappel (130g) met skil in blokkies gesny

1 blik (170g, 135g gedreineer) soliedverpakte tuna in water of olie

10ml ui, fyngekap of gerasper

30ml vars pietersielie of vinkel, gekap

10ml tamatiesous

5ml Worcestersous

’n knippie fyn witpeper

1 eier, geskei

5ml water

4 (25g) ProVita’s, fyn gerol

1 x 30g pakkie sout-en-asyn aartappelskyfies, fyn gerol

Só maak ’n mens:

1.Kook die aartappelblokkies vir 10 tot 12 minute tot sag en gaar. Dreineer, druk die aartappel met die skil fyn en laat afkoel.

2.Dreineer die tuna se water of olie deeglik. Vlok die tuna en voeg dit saam met die ui, pietersielie of vinkel, tamatiesous, worcestersous, peper en eiergeel by die fynaartappel. Meng en verkoel vir 30 minute.

3.Voorverhit die oond tot 200°C.

4.Klits die eierwit saam met 5ml water tot net gebreek. Meng die fyngerolde beskuitjie- en aartappelskyfiekrummels in ’n bord. Verdeel die vismengsel in 16 porsies en rol dit in balletjies. Rol die visballetjies in die eierwit, dreineer en rol dit in die krummels. Plaas die visballetjies op ’n gesmeerde bakplaat.

5.Bak vir 30 tot 35 minute totdat die balletjies effe bros is. Sit warm of koud voor.

*Variasies: Vervang die tuna met salm, sardyne of enige ander gaar vis. Dreineer alle oortollige vloeistof om te voorkom dat die mengsel te pap is.

*Viskoekies vir visburgers: Gebruik dieselfde resep, maar verdeel die vismengsel in twee of vier groter koekies.

*Inpak en bêre:

Verkoel die gereg tot 24 uur. Weens die aartappel daarin is dit nie wenslik om die visballetjies te bevries nie. Hou die visballetjies voortdurend goed verkoel en herverhit dit net een keer om voedselvergiftiging te voorkom.

Foto: Elmarie Knapton

#tuna #happies #potato #onion