Amerikaanse pampoentert

Heerlike tradisionele Amerikaanse pampoentert

Jy het nodig:

1 rol (400g) bevrore skilferkorsdeeg

1,2kg rou pampoen

3ml kaneel

3ml neutmuskaat

1 vanieljepeul, middeldeur gesny

230g roomkaas

250ml strooisuiker

5ml vanieljegeursel

1 eier

2 eiergele

125ml room

125ml melk

60ml gesmelte botter

250ml geklopte room

250ml gekaramelliseerde pekanneute

meel

Só maak ’n mens:

1. Skil die pampoen en verwyder die pitte. Sny in blokkies, plaas in ’n kastrol en vul met kookwater om die pampoenblokkies net-net te bedek. Voeg die kaneel, neutmuskaat en vanieljepeul by die water om dit te geur. Prut tot die pampoen sag is, dreineer en verwyder die vanieljepeul. Blits die pampoen met ’n handmenger tot heeltemal glad.

2. Ontdooi die bevrore skilferkorsdeeg en plaas op ’n meelbestrooide oppervlak. Rol die deeg uit tot helfte so dun as sy oorspronklike dikte.

3. Smeer agt mini-tertborde goed met botter en voer uit met die skilferkorsdeeg. Bedek die deeg met bakpapier en vul met rou lensies of bone om te keer dat die deeg te veel oppof. Bak die tertkorse 10 minute lank by 180°C. Verwyder die bone of lensies en die papier en bak nog 5 minute.

4. Meng die roomkaas en die pampoen tot glad. Voeg die vanieljegeursel en strooisuiker by en hou aan roer tot deeglik gemeng. Voeg stadig die eier (en eiergele) by en hou aan klits terwyl jy ook die melk, room en gesmelte botter byvoeg.

5. Vul die gebakte tertkorse met die pampoenmengsel en bak 15minute lank by 180°C. Haal uit die oond en laat minstens 10 minute afkoel voordat jy geklopte room bo-op skep en dit verder versier met die gekaramelliseerde neute. Sit dadelik voor.

Foto: Leandri van der Wat

#usa #pumpkinpie