Appelkoos-en-tiemiekonfyt met hoender en slaai

Genoeg vir twee

Jy het nodig:

Vir die appelkoos-en-tiemiekonfyt: (maak sowat 1,5kg konfyt)

1kg vars appelkose

800g suiker

2e asyn

15g vars tiemieblaartjies

’n knypie sout

Vir die hoender:

2 hoenderborsies

3e van jou tuisgemaakte

appelkooskonfyt

sap van 1 suurlemoen

1e witwyn-asyn

sout en peper

½t knoffel

2e olyfolie

Vir die slaai:

Bronkors

1 komkommer, in repe gesny

5 babatamaties, gehalveer

50g kasjoeneute

1 avokadopeer, in skyfies gesny

Só maak ’n mens:

1. Maak eerste die konfyt. Was die appelkose deeglik en sny middeldeur. Verwyder die pitte.

2. Plaas die appelkose in ’n groot kastrol; voeg die suiker, asyn, tiemieblaartjies en sout by. Verhoog die hitte tot matig en laat kook. As jy ’n gladde konfyt wil hê roer die konfyt deurgaans sodat die vrugte opbreek. As jy ’n konfyt met meer tekstuur verkies, roer een keer elke paar minute. Die konfyt moet stadig kook totdat dit begin verdik – sowat 40min.

3. Verhit intussen ’n skoon konfytfles in die oond by 150°C vir 40 min.

4. Kyk of die konfyt gereed is deur ’n klein lepel vol op ’n piering te skep en dit ’n rukkie daar te los. As dit ’n velletjie vorm en nie binne 30sek. die piering vol loop nie, is dit reg.

5. Verwyder die kastrol van die hitte, skep in die gesteriliseerde flesse en draai die deksel stewig vas.

6. Maak die hoendergereg deur die hoender in die suurlemoensap, 2 eetlepels van die konfyt, sout en peper na smaak en knoffel 30 min. te marineer.

7. Verhit 1 eetlepel olyfolie in ’n pan en braai die hoenderborsies vir sowat 12 min. tot gaar. Sny in repies en hou eenkant.

8. Rangskik die bronkors, komkommer, tamaties, neute en avokadopeer op ’n bord. Pak ook die hoenderrepies op die slaai.

9. Klits die res van die konfyt, asyn en die res van die olyfolie saam en druip dit oor slaai. Sit dadelik voor.

#apricotjam #thyme #chicken #salad #slaai