Basiliekruidpesto

Jy het nodig (maak sowat 200ml pesto):

50g vars basiliekruidblare (net blare, stingels verwyder)

2 knoffelhuisies, geskil en grof gekap

1e dennepitte

2e pecorinokaas, fyngerasper

6e parmesaankaas, fyngerasper

120ml ligte olyfolie – dit moet nie te bitter en skerp wees nie

’n knippie sout

Stap 1: Jy kan ’n stamper en vysel gebruik, maar dit verg meer inspanning om die korrekte tekstuur te bereik. ’n Voedselverwerker is heelwat vinniger. As jy die voedselverwerker gebruik, gooi die knoffel, dennepitte en van die basiliekruidblare in met ’n bietjie olie. Verpulp tot fyn.

Stap 2: Voeg die res van die basiliekruidblare by, asook die kase.

Stap 3: Gooi die res van die olyfolie bietjie vir bietjie by terwyl die verwerker die blare en kaas verpulp.

Stap 4: Die sous moet ’n gladde pasta wees, nie te veel tekstuur hê nie. Proe eers of die knippie sout nodig is voordat jy dit bysit – die twee kase is reeds baie sout en nog sout is dalk onnodig. Skep die pesto in ’n glasflessie, bedek met olyfolie en dit sal ’n lang tyd vars bly, gereed vir gebruik.

#basil #pesto #pecorino #parmesan #oliveoil #pinenuts