Bief-korma

Hierdie is ’n klassieke Noord-Indiese kerrie. Die kuns lê daarin om die speserygeure subtiel te hou, eerder as om die rissiebrand te laat oorheers, meen Francois. Die jogurt gee ’n romerigheid aan die gereg. Let wel dat hierdie aanwysings die amptelike weergawe is. As impulsiewe kok laat glip ek soms die hand en gooi hier en daar meer van dit of dat by. Hierdie korma is geduldig genoeg om jou impulse te hanteer. Jy moet net oppas vir kardamom. Die prominente smaak kan spesery-bleeksiele onthuts.

Genoeg vir 4porsies

Jy benodig:

. 800g stowebeesvleis in blokkies gesny

. 150ml natuurlike jogurt

. 15ml gemaalde komyn

. 2,5ml borrie

. 5ml papawersaad

. 5ml rissiepoeier

. 2,5ml gemaalde naeltjies

. 2,5 ml kardamom

. 15ml gerasperde gemmer

. 3 knoffelhuisies fyngekap

. sout en peper

. 500g uie in ringe gesny

. 60ml olie

So maak mens:

1. Plaas die beesvleis saam met al die bestanddele behalwe die uie en die olie in ’n bak.

2. Meng goed deur en plaas vir minstens 3 uur in die yskas.

3. Verhit die olie in ’n pot en braai die uie tot sag, roer die vleismengsel by en verhit tot kookpunt.

4. Plaas ’n deksel op en prut vir 2uur totdat die vleis murgsag is.

5. Bedien met basmati-rys en sambals.

#beef #korma #cumin #turmeric #poppyseeds #chilipowder #cloves #cardamom #ginger #garlic