Blomkoolkoek
- Errieda du Toit
- May 21, 2015
- 2 min read
Dit is ’n heerlike alternatief tot quiches en soutterte. Sit dit voor as ’n ligte ete met ’n eenvoudige komkommer-en-kruieslaai.
Bedien 4 tot 6
Jy het nodig:
1 mediumgroot blomkool, 650-700g
1 groot rooi ui, geskil
100g olyfolie
½ t fyngekapte roosmaryn
10 mediumgroot eiers
20g basielkruid, gekap (of 30ml pesto)
180g meel
2½ t bakpoeier
½ t fyngemaalde borrie
220g parmesaankaas, gerasper, of enige ander beleë kaas
sout en swartpeper
gesmelte botter om mee te smeer
30ml sesamsaadjies
15ml swart uiesaadjies (nigella-saad) of swart sesamsaad
Metode
1. Voorverhit die oond tot 180°C. Berei jou pan voor: Gebruik bakpapier om ’n ronde, losboom-koekpan van 24cm mee uit te voer. Bestryk die kante met gesmelte botter, plaas die gemengde sesam- en uiesaadjies in die pan en kantel sodat die saadjies aan die kante vassit.
2. Breek die blomkool op in mediumgroot blommetjies. Plaas in ’n kastrol met ’n teelepel sout, bedek met water en kook stadig vir 15minute tot redelik sag, maar nie pap nie. Dreineer en laat vir ’n paar minute in die vergiettes staan tot goed droog.
3. Berei die beslag voor terwyl die blomkool kook. Sny ’n paar ringe van 0,5cm aan die een kant van die ui en hou eenkant (dit gaan op die bokant van die koek kom). Kap die res van die ui grof op.
4. Verhit die olie in ’n pan en braai die gekapte ui en roosmaryn oor lae hitte vir 8 minute. Verwyder van die stoof en laat afkoel. Voeg die eiers en basielkruid by en klits met ’n ballonklitser.
5. Sif die meel, bakpoeier en borrie saam in ’n mengbak. Voeg die parmesaankaas, 1½ teelepel sout en baie varsgemaalde swartpeper by. Voeg die eiermengsel by en klits met ’n ballon-klitser om van al die klonte ontslae te raak. Voeg die blomkool by en meng versigtig sodat dit nie uitmekaar breek nie.
6. Voeg die blomkoolmengsel in die pan en rangskik die uieringe bo-op.
7. Bak die koek in die middel van die oond vir 45 minute totdat dit goudbruin en gestol is.
8. Sit warm of teen kamertemperatuur voor.
Comments