Boontjiesop met hope spek

Ma Lynette se boontjiesop is al dekades lank trooskos vir ysige winterdae. Vir dié een moet jy die drukkoker nader trek en genoeg tyd laat, want die boontjies moet eers oornag in water geweek word. Dit bedien 6-8 mense en smaak onverbeterlik saam met vars bruinbrood. Die sop is amper nog lekkerder as dit gevries was.

Jy benodig:

500g beesskenkels (shin) aan die been

500g (2 pakkies) spekstukkies

500g boontjies (oornag in water geweek)

3 groot uie, fyngekap

100g vars pietersielie, gekap

Sout en peper na smaak

Só maak ’n mens:

1. Plaas 2 liter water, die vleis, spek en boontjies asook ’n bietjie sout en peper in die drukkoker. Kook vir minstens ’n uur.

2. Voeg nou die pietersielie en uie by en kook vir nog ’n uur.

3. Ek onthou nog hoe my ma dan die vloeistof deur ’n sif gegooi en die boontjies met ’n houtlepel deurgedruk het om dit heeltemal fyn te maak (dis nou in die dae voor blitsers). Sy gee egter die versekering dit is nie nodig nie, mits jy geduldig genoeg met die drukkoker was.

4. Verwyder die bene uit die sop voordat jy dit voorsit. Voeg sout en peper na smaak by (maar moet veral nie suinig wees met die peper nie).

Foto:Nelius Rademan

#beans #soup #sop #bacon