Crème brûlée

Die oorspronklike resep is vir ’n fyngemaakte bolaag. ’n Mens kook die karamel, laat dit hard word en maal dit fyn in ’n voedselverwerker voordat jy dit bo-oor strooi. Ek gee instruksies hiervoor, asook vir die meer tradisionele lagie gebrande suiker. Die resep kan maklik verdubbel word as jy vir ’n menigte crème brûlée maak.

Jy het nodig:

6 groot eiergele

55g strooisuiker

2½ koppies room

5ml vanieljegeursel

Vir die bolaag:

1 koppie suiker (gebruik strooisuiker as jy dit met ’n blaaspyp gaan smelt)

Só maak ’n mens:

1. Voorverhit die oond tot 140°C.

2. Meng die eiergele en suiker en klits liggies saam.

3. Plaas die room in kastrol en voeg die vanieljegeursel by.

4. Verhit die room tot kookpunt en gooi dan stadig oor die eiermengsel terwyl jy vinnig klits (anders maak jy roereier).

5. Gooi die mengsel deur ’n sif en vul dan klein bakkies (ramekins) tot amper vol. Die resep lewer genoeg vir ses kleintjies of vier grotes.

6. Plaas die bakkies in ’n groot bak om ’n waterbad (bain marie) te skep. Maak die bak vol warm water (die water moet so halfpad teen die kant van die bakkies opkom). Maak die hele waterbad toe met foelie.

7. Bak 50 min. of totdat die vla gestol het. Dit moet nog ’n effense skommel (wobble) in die middel hê.

8. Haal die bakkies versigtig uit die waterbad en bedek elke bakkie met foelie. Verkoel oornag in die yskas.

9. Maak die karamel net voordat jy die nagereg wil voorsit.

Vir fyngemaakte

karamel:

Plaas een koppie suiker in ’n pan en smelt oor lae hitte totdat dit ’n mooi, ligte karamelkleur het. G ooi dit vinnig uit op ’n silikonmat (of ’n kleefvrye bakplaat) en los dit om hard te word.

Wanneer dit hard is, plaas in jou voedselverwerker en verwerk totdat dit fyn korreltjies is.

Sprinkel dit eweredig oor die crème brûlée net voordat jy dit voorsit.

Vir ’n bros suikerlagie:

Sprinkel ’n lagie strooisuiker ew eredig bo-oor elke crème brûlée.

Gebruik ’n klein kombuis-blaaspyp (beskikbaar by huiswarewinkels) en smelt die suiker. Wees net versigtig dat jy dit nie brand nie.

Laat staan ’n paar minute sodat die lagie kan hard word en sit dan voor.

– My vriendin het dié resep aangepas van een wat sy in Woolworths se Taste-tydskrif raakgelees het.

Foto: Gerrie Janse van Vuuren

#cremebrule