Dubbeldoor-macaroni-kaas om ’n familietwis te vermy

Die kaassous-metode is hier my witbroodjie. Om familietwis te vermy oor wie tamatie bo-op wil hê of nie, word ’n “two-tone”- weergawe gemaak. Aan die een kant pryk snye tamatie wat weelderig in die gesmelte kaas wegsink. Aan die ander kant bak broodblokkies tot ’n goud-bros kors. Wissel dit af met klassieke broodkrummels, pretzels, tortillas, stukkies pita of focaccia, sonneblomsade of geroosterde pampoensade.

Genoeg vir 6

Jy het nodig:

500g macaroni

2e ongesoute botter

2e koekmeel

3k warm volroommelk

1k gerasperde sterk cheddar

1t droë mosterd

2,5ml rooipeper (opsioneel)

Neutmuskaat

Sout en peper na smaak

Tamaties, in snye

Broodblokkies

So maak ’n mens:

Voorverhit die oond tot 180°C.

Kook die macaroni in goed-gesoute kookwater en kook tot net gaar (dit sal verder gaar word in die oond).

Dreineer en skep in ’n vlak, gebotterde kasserolbak.

Maak die kaas-witsous (mornay-sous): Smelt die botter in ’n medium kastrol, roer die meel en mosterdpoeier by.

Sodra die botter-meel lekker gaar is en effe neuterig ruik, voeg die helfte van die warm melk by en roer tot glad en klontvry.

Klits nou die orige melk by en hou aan roer totdat die sous verdik.

Haal van die plaat af, gooi die helfte van die kaas by, proe en geur met sout, peper, mosterdpoeier, neutmuskaat en indien verkies ook rooipeper.

Smeer ’n bak met botter, skep macaronimengsel in, gooi kaassous oor en strooi res van die kaas oor.

Rangskik tamatie bo-oor een helfte en broodblokkies oor die ander helfte.

Geur met sout en peper, en bak 20 minute.

#macaroni #cheddar #tomato #croutons