Haloumi-slaai

Dié is ’n wonderlike voorgereg, veral as jy hoender of lamsvleis as hoofgereg gaan voorsit.

Genoeg vir 6-8.

Jy het nodig:

1 komkommer

4 tamaties

5 ml gemaalde komyn

15 ml vars ment, gekap

60 ml witwyn-asyn

125 ml olyfolie

5 ml Dijon-mosterd

5 ml fyngekapte knoffel

10 ml suiker

500 g haloumi

Só maak ’n mens:

1. Berei die salsa eers voor deur die komkommer en tamatie in klein stukkies te kap en saam in ’n bak te sit.

2. Meng al die bestanddele vir die sous – van die komyn tot die suiker – en roer goed. Giet die sous oor die tamatie en komkommer.

3. Sny die haloumi in reghoeke van sowat 5 mm dik. Jy kan die kaas in ’n kleefwerende pan op ’n warm stoof braai, maar die ideaal is om dit in ’n platboompotjie oor baie warm kole te braai. Haloumi verbruin vinnig en ontwikkel ’n lekker bros kors, so dis iets wat jy kan braai terwyl jy wag vir die vuur om ’n bietjie uit te brand.

4. Plaas die haloumi op ’n mooi opdienbord en skep die salsa bo-oor. Sit dadelik voor.

#haloumi #salsa #slaai #salad