Hoender-en-koeskoes-sop met Marokkaanse speserye

Hierdie sop is ’n kombinasie van idees uit resepteboeke en die internet. Raak gerus self kreatief daarmee! Die Marokkaanse speserye gee dit ’n lekker eksotiese skop wat ’n mens van binne af warm maak. Onthou om die koeskoes by te roer net voordat jy die sop wil voorsit, anders absorbeer dit te veel van die vloeistof.

Genoeg vir 4-6.

Jy benodig:

500g hoenderborsfilette, in happiegrootte-stukkies gesny

olyfolie

1-2e Marokkaanse geurmiddel (beskikbaar by onder meer Woolworths)

1 ui, gekap

1 selderystokkie, gekap

1 groot wortel, in dun skyfies gesny

3-4k hoenderaftreksel

3 middelgroot murgpampoentjies, in ringetjies gesny

fyngerasperde skil van 1 suurlemoen

¼k koeskoes

vars pietersielie

Só maak ’n mens:

1. Verhit die olyfolie in ’n middelgroot kastrol en braai die hoenderstukkies tot bruin buite. Voeg die Marokkaanse geurmiddel by en braai vir ’n minuut of twee. Skep hoender uit en hou eenkant tot benodig.

2. Braai die ui, seldery en wortel in dieselfde kastrol vir ’n paar minute tot die ui sag is. Plaas die hoender weer terug in die kastrol.

3. Giet die aftreksel by en roer tot dit begin prut. Voeg die murgpampoentjie en suurlemoenskil by en prut so 5 minute tot die murgpampoentjie net-net sag is.

4. Roer die pietersielie en koeskoes by die warm sop net voordat jy dit wil voorsit. Jy kan nog aftreksel byvoeg as die sop vir jou te dik lyk.

Foto: Nelius Rademan

#chickensoup #sop #koeskoes #carrots #onion #zuchini #chicken #soup