Hummingbird-grootkoek

Dié klam, neuterige koek met sy roomkaas-versiersel uit die Diep Suide van Amerika is ’n niggie van die wortelkoek, maar kry sy besonderse geurigheid van pekanneute, pynappel en piesang. Daar is verskeie teorieë oor die naam: Sommige beweer dit kom van die “mmm”-geluide wat eters maak; ander meen die hoofbestanddele is alles waarvan die hummingbird (oftewel kolibrie) hou. Dit word ook Jamaika-koek genoem. Die kolibrie is Jamaika se nasionale voël.

Jy het nodig:

Vir die koek:

. 3 groot eiers

. 2k suiker

. ¾k sonneblom- of kanola-olie

. 1½t vanielje-ekstrak

. 3k koekmeel

. 1t koeksoda

. ½t sout

. 1½t kaneel

. 1 blik ingemaakte fyn pynappel, sap ingesluit

.6 ryp piesangs, fyngemaak

. 1k grofgekapte pekanneute

Roomkaasversiersel:

. 110g sagte botter

. 2 houers roomkaas, kamertemperatuur

. 1t vanielje-ekstrak

. 3 tot 4 koppies strooisuiker

Só maak ’n mens:

1. Voorverhit oond tot 180°C.

2. Smeer drie 23cm-koekpanne en voer die bodem met bakpapier uit.

3. Klits die eiers en suiker tot lig en romerig. Voeg die olie in ’n straaltjie by terwyl jy aanhou klits. Klits die vanielje by tot die beslag glad en romerig is.

4. Sif die meel, koeksoda, sout en kaneel in ’n aparte bakkie saam. Klop die droë bestanddele, ’n derde op ’n slag, by die geroomde mengsel, elke keer net genoeg om dit goed te meng.

5.Voeg fyn pynappel en sap, piesang en neute by en roer by.

6. Verdeel die beslag tussen die drie panne. Bak 20-25 minute in voorverhitte oond tot gaar (’n toetspen sal skoon uitkom en die koek trek weg van die pan af). Haal uit die oond en laat heeltemal afkoel in die panne.

Versiersel:

1. Room botter en roomkaas tot glad en romerig, voeg vanielje by en meng in.

2. Voeg suiker koppie vir koppie by en klits. As die mengsel te slap is om die koek te versier, sit dit ’n rukkie in die yskas.

Versier:

Plaas die eerste laag op die koekbord met die bakpapierkant na bo. Verwyder die papier en smeer met 1 koppie versiersel; herhaal met die volgende lae. Rond af met gedroogte pynappelblomme of gekapte pekanneute.

Wenk: Maak die pynappel-madeliefies ’n dag voor die tyd deur dun skyfies vars pynappel op bakpapier vir ’n paar uur teen 110°C uit te droog. Plaas die skyfies warm uit die oond in muffinpannetjies om dit vorm te gee. Gebruik pynappels wat ferm eerder as te ryp is.

Foto: Errieda du Toit

#hummingbird #cake #koek #creamcheese #pineapple