Jan Braai se lekker (brand)sous... Peri-peri-sous

Die sous is genoeg vir tien mense, maar as die sous baie warm is, kan meer siele daaraan smul. Die sous is besonder lekker met gebraaide steak, hoender, vis en garnale en daarom stel ek voor jy maak die sous in groot hoeveelhede.

Wat het jy nodig? (Let wel: 'n sopie is 25ml - 30ml)

. 8 knoffelhuisies, fyngekap

. ½k olie

. ½k druiweasyn (rooi of wit)

. ½k suurlemoensap

. ½k water

. 1 sopie paprikapoeier

. 1 sopie rissiepoeier

. 1 sopie sout

. ’n paar klein, sterk rissies (opgekap – ek gebruik piri-piri, oftewel African Bird’s Eye)

Só maak mens:

1. Gooi die fyngekapte knoffel in ’n glasbottel of -fles saam met die olie, asyn, suurlemoensap, water, paprika, rissiepoeier en sout. Skud behoorlik totdat die bestanddele gemeng is en die sout opgelos het.

2. Proe nou aan die sous en gee hom meer skop. Voeg een of meer fyngekapte rissies by en skud behoorlik. Jy kan soveel rissies byvoeg as wat jy wil, maar onthou, jy kan nooit van jou gaste verwag om ’n sous te eet wat vir hulle te sterk is nie. As jy, soos ek, daarvan hou dat die sous ordentlik brand, is dit dalk ’n goeie idee om twee brousels te maak, waarvan die een meer rissies in het.

3. Moenie aan jou oë of ander sensitiewe dele van jou liggaam vat wanneer jy dié sous gemaak het nie omdat enige rissiesap op jou hande jou sal brand dat jy hop. Was jou hande deeglik, maar bly steeds versigtig.

4. Jy kan die sous onmiddellik gebruik, maar hy raak selfs lekkerder met verloop van tyd en sal weke lank in die yskas hou.

Wenk: As jy nie ’n hele fles peri-peri-sous nodig het nie, gebruik dan dié hoeveelhede: 1 sopie olie, 1 sopie asyn, 1 sopie suurlemoensap, 1 sopie water, 1t paprika, 1t rissiepoeier, 1t sout, 2 knoffelhuisies (fyngekap) en 1 of meer klein, sterk rissies.

Foto: Matthys van Lill

#periperi #sauce #chili #spicy