Karringmelk-plaatkoekies

Jy het nodig:

150ml karringmelk, by kamertemperatuur

225g meel

¼t sout

½t witsuiker

1t droë gis

150ml warm water

¼t koeksoda

1t botter, vir smeer

Om voor te sit: heuning, vars ricotta, bessiekonfyt of gerookte salm, suurroom en kappertjiesade

Só maak ’n mens:

1. Meng al die droë bestanddele behalwe die koeksoda saam in ’n groot mengbak. Maak ’n holte in die middel en voeg die karringmelk en warm water by. Meng tot ’n gladde deeg vorm.

2. Bedek met ’n vadoek of kleefplastiek en laat staan op ’n warm plek vir ’n uur. Ná ’n uur behoort die deeg se volume verdubbel het en die mengsel moet lig en sponsagtig wees. Roer die deeg om van die meeste lugborrels ontslae te raak en voeg die koeksoda by en roer goed.

3. Giet die deeg in ’n beker met ’n tuit en laat staan op ’n warm plek vir 30 minute.

4. Verhit ’n kleefwerende pan oor matige hoë hitte. Smeer vier eierringetjies (metaalringe wat ’n mens gebruik om netjiese gebakte eiers te maak) met botter en plaas in die pan. Giet genoeg deeg in om die ringetjies halfpad vol te maak.

5. Verhit totdat borrels bo-op die plaatkoekies vorm. Dit behoort sowat 10 minute te neem. Verwyder die ringetjies versigtig en draai die plaatkoekies met ’n eier­spaan om. Braai nog twee minute en skep dan uit. Herhaal totdat al die deeg opgebruik is.

6. Sit die plaatkoekies warm voor met vulsels van jou keuse.

– Resep met toestemming gebruik uit "A Homegrown Table".

#buttermilk #pancakes