Kersfees-vrugtekoek

Jy het nodig:

500g sultanas

375g rosyntjies

300g glanskersies, grofgekap

300g korente

250ml brandewyn

gesmelte botter, om pan mee te smeer

250g botter, by kamertemperatuur

155g donkerbruinsuiker

4 eiers, by kamertemperatuur

80ml marmelade

500ml meel

125ml bruismeel

7,5ml gemengde speserye

80ml brandewyn

Só maak ’n mens:

1. Sit die sultanas, rosyntjies, kersies en korente in ’n groot mengbak en gooi die brandewyn oor. Bedek met kleefplastiek en sit eenkant vir ten minste 6 uur sodat die vrugte lekker die brandewyn kan absorbeer. Roer elke nou en dan.

2. Voorverhit die oond tot 150°C. Berei ’n ronde koekpan met ’n 22cm-deursnee of ’n vierkantige pan van 18cm voor deur die bodem en kante deeglik met bakpapier uit te voer.

3. Verroom die botter en suiker en voeg dan die eiers een vir een by. Klits goed ná elke byvoeging

(die mengsel mag dalk in hierdie stadium skif, maar dit is net omdat daar so baie eiers in verhouding tot die botter is en dit sal nie die eindresultaat beïnvloed nie).

4. Voeg die marmelade by en klits goed tot gemeng.

5. Meng die meel, bruismeel en speserye in ’n mengbak en roer dit by die eiermengsel in.

6. Roer die vrugtemengsel by en roer deeglik om te meng.

7. Skep die deeg in die voorbereide pan en maak dit bo-op glad. Bind drie lae koerantpapier buite-om die pan en maak vas met tou (die koerantpapier moet hoër wees as die kante van die bak). Jy kan ook die bak met foelie bedek as jy bang is dit gaan te bruin bak bo-op (ek het nie en die koek was volmaak).

8. Bak in die oond vir 3 uur en toets dan met ’n toetspen. As dit nog nie gaar is nie, bak nog 20 minute en hou aan toets totdat die toetspen skoon uitkom. Haal uit die oond en gooi die ekstra 80ml brandewyn oor. Draai die pan toe in ’n vadoek en laat oornag afkoel.

9. ’n Mens kan die koek dadelik eet, maar ek hou daarvan om dit vir so ’n paar weke met nog

brandewyn te dokter. As jy dit ook wil doen, draai die koek toe in foelie en bêre dit in ’n lugdigte houer.

10. Skep elke week ’n paar eetlepels brandewyn oor die koek om te verseker dat dit lekker ryk en klam sal wees wanneer dit tyd is om die Kerskoek te sny.

– Aangepas van www.taste. com.au.

Foto: Gerrie Janse van Vuuren

#kersfees #fruit #cake #vrugtekoek