Lensiesop met varkworsies en pasta

Dié sopresep is al telkemale aangepas van ’n resep wat ek jare gelede in ’n slapband-sopboek van Woolworths gekry het. Die sop voed 6-8, maar ek maak dit gewoonlik dubbel omdat dit baie goed vries.

Jy benodig:

Olyfolie

2 knoffelhuisies, fyngekap

3 middelgroot uie

250g (1 pakkie) spekstukkies

4 selderystingels, in dun skywe gesny

6 middelgroot wortels, in dun skywe gesny

800g (2 blikkies) tamaties

250g rooi lensies

1 liter lam- of hoenderaftreksel

1 koppie fyn pasta (soos klein skulpies, ryspasta of gebreekte spaghetti)

1 pakkie varkworsies (bockwurst of goeie Weense worsies) in skywe gesny.

’n Handvol vars pietersielie, fyngekap

Só maak ’n mens:

1. Braai die uie, knoffel en spek in olyfolie totdat die uie sag en deurskynend is.

2. Voeg die seldery en wortels by en braai vir nog sowat vyf minute.

3. Voeg nou die tamaties, lensies, die aftreksel en ’n liter water by. Laat dit vir sowat 40 minute prut.

4. Voeg nog 3 koppies water en die pasta by en kook totdat die pasta amper gaar is.

5. Voeg dan die pietersielie en die varkworsies by. Kook totdat die varkworsies deurwarm en die pasta heeltemal gaar is.

6. Die sop is redelik dik (en veral ook as jy dit gevries het en weer warm maak). Voeg nog aftreksel of water by na smaak.

Foto: Nelius Rademan

#lenthils #porksausage #bacon #cellery #soup #sop #tomato #pasta #parsley #carrots #lentils