Madeleines

Jy het nodig:

2 eiers

2m l vanieljegeursel

’n knippie sout

80ml witsuiker

125ml meel

12,5ml fyngerasperde suur¬lemoenskil

60ml botter

80ml witsuiker, ekstra

Só maak ’n mens:

1. Voorverhit die oond tot 190°C. Bespuit ’n madeleine-pan met kleefwerende kossproei (as dit ’n kleefwerende silikoonpan is soos myne hoef jy dit nie te doen nie).

2. Smelt die botter en laat afkoel tot kamertemperatuur.

3. Plaas eiers, vanieljegeursel en sout in die bak van jou elektriese menger en klits op hoë spoed tot lig (jy kan ook ’n elektriese handklitser gebruik).

4. Klits aanhoudend en voeg die suiker geleidelik by. Hou aan klits op hoë spoed tot dik en liggeel (sowat 5-10 minute).

5. Sif die meel en voeg dit in drie sarsies by die eiermengsel. Vou die meel telkens liggies met ’n deegskraper in (moenie dit byklits nie).

6. Voeg die suurlemoenskil by en giet die gesmelte botter om die kante van die beslag. Vou vinnig maar versigtig die botter en skil by die beslag in.

7. Skep lepelsvol van die deeg in die holtes van die madeleine-pan (moenie dit té vol maak nie). Bak 14-17 minute of tot die koekies goudbruin en gaar is.

8. Plaas die madeleines op ’n afkoelrak en besprinkel dadelik met die ekstra witsuiker. Madeleines is die lekkerste op die dag wat hulle gebak is. Oorskiet-koekies is heerlik wanneer ’n mens dit in koffie of tee doop.

Sjokolade-variasie: Laat die suurlemoenskil weg. Verhoog die suiker na 125ml en vervang 2 eetlepels van die meel met 60ml onversoete kakao (sif dit by die beslag saam met die meel).

– Aangepas van allrecipes.com.

Foto: Gerrie Janse van Vuuren

#madeleines #france #kleinkoekies #cookies