Malvapoeding in 'n potjie

Genoeg vir 6

Jy het nodig:

Vir die deeg:

1 koppie meel

½ sopie koeksoda

1 koppie witsuiker

1 eier

1 skeppie appelkooskonfyt

1 sopie asyn

1 sopie gesmelte botter

1 koppie melk

Vir die sous:

½ koppie room

½ koppie melk

1 koppie suiker

½ koppie warm water

½ koppie botter

Laat waai:

1. Steek die vuur aan. Jy het minder kole nodig as wanneer jy steak braai, maar jy moet ’n aaneenlopende voorraad hê as die poeding eers bak.

2. Smeer jou no. 10-platboompotjie met botter.

3. Sif die meel en die koeksoda in ’n groot bak en meng die suiker by. As jy in die bos is en nie ’n sif byderhand het nie, moenie bekommerd wees nie, dinge sal steeds uitwerk.

4. Klits die eier deeglik in ’n aparte mengbak. Voeg die konfyt, asyn, botter en melk by en klits deeglik ná elke byvoeging.

5. Voeg die nat bestanddele van stap 4 by die droë mengsel van stap 3 en meng deeglik met ’n houtlepel (jy maak immers deeg).

6. Gooi die deeg in die potjie, sit die deksel op en bak vir 50 minute met kole onder die pot en ’n klompie op die deksel. Moenie te veel hitte gee nie, want jou poeding loop groot gevaar om te brand. Die hitte kan liewer effe te laag wees en jy kan die poeding netsowel ’n uur lank bak.

Wees eerder te rustig as te haastig. Jy kan enige tyd nog ’n paar vars kole onder die pot inskuif of op die deksel pak as jy dink jou poeding verloor stoom.

7. As die poeding al so 40 minute lank bak (sowat 10 minute voordat hy klaar gebak het), verhit jy al die bestanddele vir die sous in ’n klein pot op medium- kole. Roer aanhoudend om te verseker dat die botter smelt en die suiker heeltemal oplos, maar moenie dat die mengsel kook nie. As jy ’n poeding wil hê wat (effens) minder soet is, gebruik ’n halwe koppie suiker en ’n hele koppie warm water vir die sous, eerder as die hoeveelhede in die bestanddele-lys.

Om die waarheid te sê, my ouers verkies dit so.

8. Wanneer die poeding omtrent 50 minute gebak het, steek jy ’n sosatiepen, mes of vurk in die middel om te toets of dit gaar is.

As die pen skoon uitkom, is die poeding reg.

9. Haal die poeding van die vuur af en gooi die sous eweredig oor.

Glo my, hy sal al die sous intrek – laat staan hom net ’n paar minute. Bedien die malvapoeding warm met ’n skeppie vanieljeroomys, ’n leksel vars room of ’n poel vanieljevla.

’n Goeie manier om die poeding warm te hou, is om die pot naby die vuur te sit, maar nie te naby nie. Jy wil hom nie nou verbrand nie.

#malva #pudding #potjiekos #erf #southafrica